Rev 15 | ZomZIV | STEP | Vantung ah alian a piandang lim khat ka mu a: vansawltak sagih in a nunung gimna sagihte a tawi uh hi - a nunung ahi hi; bang hang hiam cih leh Pasian thangpaihna a kimna hi ta hi.

Revelation of John 15

Vansawltak Sagihte, Gimna Sagih Tawh

1 Vantung ah alian a piandang lim khat ka mu a: vansawltak sagih in a nunung gimna sagihte a tawi uh hi - a nunung ahi hi; bang hang hiam cih leh Pasian thangpaihna a kimna hi ta hi. 2 Limlang tuipi le mei kigawm tawh kibang khat le gamsa le ama min le ama min nambat tunga gualzote, tuipi kianga ding ka mu hi. Amaute in Pasian piak harpte tawi uh a, 3 Tuuno la le Pasian nasem Moses la sa in: ^a

“Thahatpen Topa Pasian, ^b
nangma nasepte lian in, piandang hi. ^c
Khanghunte kumpipa aw,
na lampite thumaanin thutang hi. ^d
4 Topa aw, kua’n nang hong kihta loin, ^e
na min thangsak lo ding hiam? ^f
Ahang in, nangmah bek na siangtho hi.
Amaan nangma sepnate,
kilaak khin zo ahi manin,
minam khempeuh hong pai-in, na mai-ah hong bia ding uh hi,” a ci uh hi.

5 Hih teng khit ciangin ka et leh, vantungah teci panna biakbuk ahi, biakinnpi honsa in a om hi. 6 Vansawltak sagihte biakinnpi pua-ah gimna sagih tawh hong paikhia uh hi. Amaute in puansiang le a tang saihadial puan silh uh a, a awm uhah kham dialpek a baat uh hi. 7 Tua ciangin a nungta ganhing lite khat in, vansawltak sagihte tungah a tawntunga nungta den pa, Pasian thangpaihna tawh a dim kham kuangkum sagih a pia hi. 8 Tua ciangin Pasian minthanna le ama vangliatna pana meikhu, biakinnpi sung tengah dim a, gimna sagihte a kim khit matengin vansawltak sagihte tua biakinnpi ah khatbeek a lut thei kei uh hi.